Der Mann im Mond
Armstrong, dä Mann im Mond - ph! Dat wüßt ich ewwer! Die han domols en enem Film-Studio jet Sand opjeschütt, paar Felsbrocke hinjeschmisse un dat janze à la Spielberg opjenomme. Dohinger ei Leinwand, eine halve Jlobus dropprojezeet, un dä Fall wor jeritz. Un en dä Kuliss hätt dä Armstrong singe Moon-Shuffle jedanz (Choreojraphie: Michael Jackson). Wat ei Bild! Nur: vun vöre bes hinge jeloge. Weil:
1. Do bovve jitt et kei McDonalds. Ohne dat es dä Ami opjeschmisse. Weil: wat dem Bergheimer dat Joldkettche, dat es dem Ami singe Hamburger.
2. Domols hätt et noch kei Ozonloch jejowwe, wo mr durch muß, für in et All ze flieje. Also: wie hätt do ei Raket övverhaupts huhkumme künne?!
3. Sellevs wenn sie huhjekumme wöre, sie hätte dat Teil nit jefunge, weil domols Neumond wor. Un wo nix es kann keine hin.
4. Dä Russ hätt et ei Woch vürher versök. Wat wor: Dä Mond wor ei Sichel un die sin paffdich! do durchjefloge, weil die Sichel ze schmal wor für dodrop lande ze künne. Die han dat Teil nit mieh unger Kontroll jekräje, sin jäje dr Mars jeballert un die Brocke falle am 20. Juli op dr Jupiter.
5. Dr Mond es Rheinländer. Vum Wesen her suwiesu: mol es he do, mol es he fott. Ewwer nit nur dat: he paß jenau (ich hannet met dem Anwerpes usjemesse) en de Kölner Bucht ‘erein. Un dat es, weil die domols met dem Erfttaler Schaufelradbagger dat janze Becke usjebaggert han un schwupp! nohm Motto: wat fott es, es fott, han die dat Teil durch et Ozonloch noh bovve jedäut. Un deshalb bruch do och keine hin als Mann im Mond, weil: do es schon eine. Uns Mann im Mond: hück wie vor twintich Johr dä unsterbliche Millowitsch! Also: loht Üch von denne Amis nit die Pläät jeck maache. Wo dä hinwill, sin mir at lang!
In diesem Sinne
Ihr
Konrad Beikircher
© 2012 Konrad Beikircher für die Musenblätter - Redaktion: Frank Becker
|
Der Mann im Mond
von Konrad Beikircher
Das Feuilleton
06.03.12
