Schnurlos

von Konrad Beikircher

Foto © Frank Becker
Schnurlos
 
Han Sie och en schnurlos Telefon? Also met ohne Schnur? Quasi kabellos? Sie wissen schon: dat sin die Dinger, wo dä Charles un dat Lady Di damols esu met ereinjefalle sin, weil do jeder bessere Funkamateur die janzen Jespräche mithüre kann. Jedenfalls: die han et in sich. Weil man sie överall met hinnemme kann, es man die Dinger ständig am sööke. Man hürt die Klingel ewwer: wo es dann dä Sch...hürer hinjekumme? Bei uns wor dat Dingen letztens em Köhlschrank, weil ming Frau telefoneet hätt, dodebei ussem Jemösfach dä Schlot erusholle wollt, dat Dingen hät ewwer jeklemmp, et legt dä Hürer ovve in et Iesfach, weil et jo beide Hängk bruch öm do dä Schlot eruszeholle...Jedenfalls: kei Minsch wußt mieh, wo dat Dingen es. Un wenn net die Pänz e lecker Ies jewollt hätten, dät dä Hürer immer noch em Iesfach lieje. So wick, esu jot. Normal. Ewwer dat Schöne am kabellosen Telefon es, dat do die Pänz janz neue Spillmöchlichkeite han. Hier: Ene Bekannte hät jet ze Hus verjesse. Hä rööf us dä Konferenz zu Hus an. Om Telefon es dat sechsjährige Enkelchen. "Liebchen", sät minge Bekannte, "hollens flügg dr Pap an't Telefon, ich bruchen jet". Do flüstert dä Kleen: "Der kann jetzt nicht". "Jot, dann hollens die Mamm". Dä Kleen flüstert wigger: "Die hat zu tun". "Jo jot, dann jangens erop un hollens die Oma, jo?". Dä Kleen es wigger am flüstere: "Die hat jetzt auch keine Zeit". "Jo wat es dann los bei Üch ze Hus, wat sin die dann all am maache?". Dö flüstert dä Kleen: "Die suchen mich!!". Un mindstens dodefür sollt man dr Poß dankbar sin, ne?!
 
In diesem Sinne
Ihr
Konrad Beikircher
 
 

© 2011 Konrad Beikircher für die Musenblätter - Redaktion: Frank Becker