Heiligabend

von Konrad Beikircher

Foto © Frank Becker
Heiligabend
 
Ein ganz normaler Heilig-Abend-Nachmittag. Sie schmückt die Tanne, er kramt im Flur im Kabäuschen. "Sarens, Liebelein, wo hässe dann et Lametta?"."Em schwazze Kattong, Liebchen". "He es ewwer keine schwazze Kattong, Liebelein". "Sicher es do ene schwazze Kattong! Dreck hingerm rude Koffer, Liebchen". "He es och keine rude Koffer, Liebelein". "Wie: he es keine rude Koffer? Dä rude Koffer wor immer do, dreck vür dem schwazze Kattong mem Lametta, Liebchen". Schon lauter:"Ewwer he es keine Koffer un keine Kattong!"."Dä Koffer wor ewwer immer do. Wo hässe dann dä Koffer hinjedon?"."Ich han dä Koffer övverhaupts net anjepack. Meins Du, ich jing an Ding Saache? Dat han ich mir zick Johrzehnte at avjewennt!". "Wat soll dat dann heißen?"."Dat soll heiße, dat ich mich im Levve nit an Ding Unordnung jewenne kann und dat ich deswäje die Fingere vun losse!." "Un dat sähs Du mir jetz? Noh 35 Johr? Do hät man sich avjeplag, do hät man e Levve lang opjeräump, do hät man für all ei Plätzche jeschaffe, domet Du et schön häs, do schmück man sich am Baum die Finger wund, un dann esu jet..."."He: ming aal Schohn, die fottjeschmiße jehüre däte un dreck dodrunger ei Kasten Kölsch, ES DAT ORDNUNG? Un donewwe die Kiß mem Heffpflaster, ES DAT ORDNUNG?"."Esu sin die Männer: dat einzigste, wat sie künne, es: Froge stelle! Ewwer Antwort jewwe: do kannse ei Lewwe lang drop waade! Weiß Du, wat Du mich langsam kanns? De Mai piefe, Du jecken Doll. Un dä Baum kanns Du Dir och at selver schmücke. Ich jon noh ming Mutter!". Paff! Dür zo. Jetz ei Schnäpsche, für sich ze beruhige, dann flück dä Baum jeschmück. Un wenn sie nohm Stündchen noh Hus kütt (it wor jet Huhwasser luure): "Do besse jo, Liebelein, dät mr leid" und "Fröhliche Weihnachten, Liebchen" un e Büzzje. Normal! Oder?!
 
 
In diesem Sinne wünscht Ihnen ein schönes Fest
Ihr
Konrad Beikircher
 


© 2012 Konrad Beikircher
Redaktion: Frank Becker