Rheinische Tierliebe

von Konrad Beikircher

Foto © Frank Becker
Rheinische Tierliebe
 
Dat dä Rheinländer tierlieb es - klar. Op dr eeschte Blick es do och keine Ungerschied zum Tierliebhaber us Berlin oder München. Un doch: e Winterpullöverchen für dä Hungk wie in Berlin wör em Rheinland quasi undenkbar. Un wenn, dann sin et Frauchen oder Herrchen net von he. He em Rheinland bliev die Wirklichkeit stärker em Spill. Dä Hungk es net esu verklärt als wies en andere deutschzüngije Rejione. Nen Hungk es och en Dier un domet es die Stellung vun Hungk, Dier un Minsch klar ömrisse. Un do simmer at widder em November: et Tant Jechtrud es verstorbe un om Melaten es all die buckelije Verwandtschaff do für et letzte Jeleit. Och dä Franz. Dä Franz hät ene Hungk. Dä Willi. In dem Moment, wie dä Zoch loß jeiht, es dä Willi plötzlich fott.  Jetzt es dä Franz net einfach esu ene Franz. Hä es ene Bejiriff. Wo et jet ze laache jitt: dä Franz wor dobei. Mer kann sage: ohne Franz kei Huhzick un kei Leich. Un jetz es dä Franz plötzlich fott, weil dä singe Hungk am sööke es. Langsam ewwer sicher kütt e jewiße Verlejenheit en dr Zoch. "Wo es dann dr Franz?" es die Frog, die övver dem janze Leichezoch steiht. All sin se am luure un don doch esu, als wies wenns sie janz beim Tant Jechtrud wöre met ihre Jedanke. Dä Franz es en dr Zweschezick quer öwwer die Jräber jesprunge, hät he jepfiffe un do jelock: "Willi, Willichen" ewwer kei Willi en Sicht. Un wie sie all am offene Jrav ston, die Tränche loofe losse und övverhaupts sich jar nit mieh inkrieje övver dä Verluß vum Tant Jechtrud (nevvebei: em Levve hät die keiner ligge künne - normal, ne!), un wie et Tant Jechtrud sachte tiefer jelegt weed, kütt plötzlich dä Franz anjerannt un röf: "Dä Willi es am poppe, dat bruch sing Zick, mir künne wiggermaache!". Esu en Leichenfeier, dat kann ich Ihnen sage, hät dä Melaten och nit oft jesin.
 
In diesem Sinne
Ihr
Konrad Beikircher
 


© 2011 Konrad Beikircher für die Musenblätter - Redaktion: Frank Becker