Als es die neuen Postleitzahlen gab

von Konrad Beikircher

Foto © Frank Becker

Als es die neuen Postleitzahlen gab

(Erinnern wir uns mit einer Glosse unseres Kolumnisten)
 
"Jetz noch drei, dann hammeret" sage ich für ming Frau jestern ovend om Balkon. Wie: wat für drei? Poßleitzahle natürlich. Wie jeder en dä bescheidenen Republik han mir och dieser Daach uns Adressbuch op zack 'jebrunge'. Ovend für Ovend sin mir zwei om Balkon jesesse un han uns Adresse zojerofe un bes op fünnef Stelle hingerm Komma, quasi, erneuert. Un mitte drin en dem Durcheneer moot ich ene Breef noh Kölle schrieve, noh der Express. Ich dä Breef enjetüüt, zujeklevv, Express, Pressehaus un Kölle dropjeschrivve un sage für ming Frau: "Wat es dat dann für en Poßleitzahl?", do wor et passeet. Et Buch wor fott. Obwohl dat Buch e fümfstellig Jewicht hät, nirjends Platz hät un eijentlich nur jot es für dropzesteije, wenn man vun janz ovve em Regal dä Weihnachtsschmuck holle will: et wor fott. Ich: "Es net schlimm, ich jon nohm Poßamp, die wisse Bescheid". Ich nohm Poßamp. Do stund en Schlang vun sibbezich Mann für noh der neu Poßleitzahl ze froge. En Stund später stund ich om Schalter. Rrrumms! Fierovend. Stund ich do. Dä Breef muß noh Kölle. De aal Poßleitzahl dropschrieve? Jeiht net. Dann bruch dä Breef sibbe Woche oder esu. Un do es mir dä rude Punk injefalle. Wissen Sie noch? Domols die Proteßaktion jäje die Fahrpreiserhöhung em Nohverkehr: jeder hät Lück metjenomme. Un dat Zeichen dofür wor dä rude Punk om Auto. Un et hät jeklapp. Und dat wor DIE Idee. Ich noh minge Nohbor jeloofe. He fährt jeder Daach noh Kölle. "Sid esu jot und nemp dä Brief met, jo?". "Kei Problem, ich han noh mieh ze bestelle" und zeigt mir die Täsch met mindstens drißich Breef drin. Ich demm die Mark jejowwe und wat soll ich Üch sage: am jleichen Daach wor dä Breef do! Do kann die Poß nur von dräume! Also dann, lev Lück, wat die Poß kann, künne mir at lang! Un bruche noch netens en Poßleitzahl für!
 
In diesem Sinne
Ihr
Konrad Beikircher
 
 
 © Konrad Beikircher - Redaktion: Frank Becker