Foto © Frank Becker Olympischer Alptraum   Jetz stellt üch vuur, Berlin hätte damals in den Nüngzijern et Olympia jekräje! Do hättet es jetz so langsam jeheiße: Jetz ewwer flück vüran, Wowereit un Schäuble, et es vill ze don. Et Leni Riefenstahl us dä Versenkung jehollt, domet et die Helden-Linse einspannt un die jestählten jungen Körper filme kann. Einzigster Ungerschied zu domols: hück han diese Art junger "Helden" keine stramme Scheitel mieh, sondern eher en Jlatzköppche. Ewwer dat hätt et Leni och noch jeschafft. Dann schnell ene "Lichter-Dom" opjebaut, weil dat domols esu herrlich wor. Vielleicht levv dä Jesse Owens noch, dä könnt dann als quasi später Protest die Medallie vun domols demonstrativ zurückjevve. Wör dat net schön? Na ja, dä is jo schon zick 1980 duut und et Leni hätt et ja och nur bis 2003 jeschafft. Dä Aale-Büggel-Club öm dä Rogge sorgt für Kontinuität en dr Jeschichte. Nur der Tonfall bei dr Eröffnung weed anders sin. Do weede ich dat rollende R ärg vermisse :"Ich errrrrklärre die olympischen Spiele fürr errröffnt!". Dodajäje es dat "I ergläre die olümbischn Schpiele for eröffned" - falls dä Winfried Kretschmann dann Präsident wär - doch e bißje lau, ne. Ewwer jot, willse mache. Jetz wör nur noch die Frog med dem Jeld ze kläre – wo doch die Jriechen als die Erfinder von Olympia restlos den Dalles han und wir als sozesaren Selfsbedienungsbank der Europäer widder mal fös alles jrade stonn, wat die anjezettelt han. Ewwer och do hätt et Merkelche sicher schon e Lösung parat: et nähm drei Woche Sonderurlaub en Monte Carlo. Un do stellt et sich annet Roulett un läß die Kugel flitze. Un do sin ich zuversichtlich: wer esu ussüht, kann nur Jlöck em Spill han. Un falls dat net klappe dät, hätte dä Schäuble sicher noch ene Sonderfong zum Sonderfong parat. Ewwer dat wor ja nur ne kurze Alptraum. Et Sydney hät schließlich bei dä Ziehung jewonne. Wat för ne Jlück för uns zuhus!   In diesem Sinne Ihr Konrad Beikircher © Konrad Beikircher - Redaktion: Frank Becker