Nintendo-Absolution

von Konrad Beikircher

Foto © Frank Becker
Nintendo-Absolution
 
Jetz isset offiziell: nee, net Karneval, obwohl dat och passe dät, hier: Vatikan. Et es schon wat her, ewwer noch immer interessant, da wor ze läse, dat et do unge – also em Fatikan - dä Rusekranz om Game-Boy jitt. 70 Mark hät dat Teil damols jekoss.  Dat wär doch och hück widder, wo die Session am lope es, en jode Idee für die Reue nohm Karneval am Aschermittwoch ze verschenke. Muß ewwer bar bezahlt werden, weil die Jungs em Fatikan neuerdings nit mehr kreditwürdig sin. Eimol op dr Knopp jedrück und av jeiht dä jlorreiche oder dr schmezzhafte Rusekranz. Es dat net super?! Dä Vatikan als Super-Mario-Land (oder sollte mr sare: Super Benny-Land?)! Met einem Schlag es dä hillije Vater op janz modern ömjeschwenk. Un do hätt ich noch e paar Anregungen: jede Katholik (ich och) kritt eine Super-Joy-Stick un met 16 Mega-Byte jeiht et av. Ziel vun demm Super-Nintendo-Sega-Game-Boy-Spill es et zehnte Level: dä Himmel. Un jetz paß op: do links kütt ei Versuchung jefloge. Paff! met enem Krüzzeichen ussem Weg jeballert. Vürsicht! Vun janz unge kumme drei schwere Sünden an. Ratazonng! Met zwei Rusekränz avjefedert. Un jetz en die Kirch für Bonus-Punkte avzeholle: 1 Punkt für ei Jebet, 10 Punkte für die Kommellion. Ewwer Vürsicht: links nevve Dir steiht e lecker Mädche (dat es dä Deuwel persönlich, wie dä jeübte Joy-Sticker weiß!), jetz net hinluure, sons sin die Bonus-Punkte fott. Flügg op "Stoßjebet" jedröck und die Jefahr es jebannt. Ewwer do es et passeet: Du häs verjesse, jet en dr Klingelbeutel ze don, sühs Dinge Nohbor, wünschs demm die Krätz an dr Hals un bes bei dr Meisner-Predigt injeschlofe! 20 Minus-Punkte (bei 25 Fegefeuer, bei 50 Hölle)! Do jitt et nur eins: sofort en dr nächste Beichtstohl un do die Jeheimwaffe avjehollt, dä "Ego-Te-Absolvo-Bonus". Jetz noch ei klei Wallfahrt nohjeschobe un du bes ussem Schneider. Jlöck jehatt. Un wenn dat all klapp, kritt man om 9. Level dä Hillijeschein un es em 10. Level em Himmel. Also, lev Lück, ich weiß et net. Für mich wor e Jebet jet Persönliches. Ewwer wenn et och mem Game-Boy jeiht...
 
In diesem Sinne -
und alaaf!
 
Ihr
Konrad Beikircher
 
 
©  2013 Konrad Beikircher für die Musenblätter
Redaktion: Frank Becker