Männer

von Konrad Beikircher

Foto © Frank Becker
Männer
 
Tach zesamme, hück wollt ich ens jet zum Thema „Männer sind zu faul zum Putzen“ schrieve, weil...wat es? Dä Klein hätt en die Buzz jedrisse? Zementens, ich kummen...also, wie jesagt, ich wollt zum Thema „Männer sind zu faul zum..“...Wie: Du finds dä Eimer net? Hinge em Kabäuschen! Wie: do es nix? Jo wo es dann dr Eimer? Waadens, ich gucke mal em Gästeklo...Dat Thema also „Männer sind zu faul...“...Schmierseif? Oh, zementens, die han ich jestern em Keller jesin. Wie: wat hätt die dann em Keller verlore? Vielleicht wor ich do jestern am putze oder wat! Nee, loß, Liebelein, ich holle Dir flückens die Seif...Ich wollt also, wie jesagt, zum Thema „Männer sind zu...“...Och Liebelein, jetzt loß doch dr Eimer, ich mach dat dann später, jo? Wie: dat kenn ich? Wat soll dat dann heiße? Ich han jetzt kei Zick für ze Putze, ich sin am Schrieve...Also, dat Thema wor, zementens, ah jo, hier: „Männer sind...“...Wie: dä Aufnehmer es fott? Jo wo es dann dä Aufnehmer? Ah jo, tschuldigung, Liebchen, dä han ich in dä Garage jebruch, vürjestern, vür dat Öl wegzemache, zementens, ich bring dir dat Teil...Ich mein, do jitt et jo vill ze schrieve, zu dem Thema „Männer...“...Wie: et es erledigt? Hässet Putze dranjejovve? Wat? Feedich? Jo, ewwer ich sage jo, dat ich dat später sellver jemacht haben wollt..Wie: danke für die Hilfe? Nix ze danke, Schatz, ich helfen jo jään mingem Liebchen, ne, wenn et jeiht...Also ich muß jo sage, zum Thema „Männer sind zu faul zum Putzen“ fällt mir eijentlich nix ein, ne, weil: bei uns ze Hus es dat esu partnerschaftlich opjedeeld, do packen ich jenau esu an wie ming Frau, ne, ich sage immer: Arbeitsteilung es dat Jeheimnis einer jlöcklichen Ehe, ne! Oder?!
 
 
In diesem Sinn
Ihr
Konrad Beikircher
 

 
© 2012 Konrad Beikircher für die Musenblätter - Redaktion: Frank Becker