Schäubles Schräuble-Verbot

Heute so aktuell wie damals

von Konrad Beikircher

Foto © Frank Becker
Aktuell geblieben:
Schäubles Schräuble-Verbot
 
Danke, Schäuble, danke! Dinge 20 Johr alte Satz vun dr „gigantischen Schattenwirtschaft“ durch Heimwerker hät sick dem all denne Mannslück, wat wie ich zwei linke Hängk han, dä Rücke jestärk! Super! Hier: Samstag nohmeddach, ming Frau hät ei Regälche für et Bad jekoof. „Liebche, künnts Du mir dat Regal flückens an die Wand düvvele?“. „Enee!“. „Warum dat dann nit? Hässe kei Zick?“. „Doch, ewwer ich darf dat nit mieh“. „Wat soll dat dann heiße: ich darf dat nit mieh?“. „Wäje dem Schäuble singem Schräuble-Verbot!“. „Wie: Schräuble-Verbot?“. „Jo hässet nit jelesse? Heimwerker sin Schwazzarbeiter un wenn 30 Millionen sich sellver hellefe, wör dat ei ‘gigantische Schattenwirtschaft’ un dat jeiht nit“. „Die zwei Düvvele für et Bad ei gigantische Schattenweetschaff? Jo häs Du sie noch all?“. „Eja, ich mein: enee, weil, guckemal Liebelein: wenn von denne 30 Millionen Heimwerker hück nohmeddach jeder zwei Düvvele schwazz en die Wand däut, sin dat 60 Millionen Düvvele. Dat sin 60 Millionen Mark (hück datselwe in Euro!). Für dä Handwerker kummen jetz dabei: hallev Stund Anfahrt, hallev Stund Heimfahrt sin 60 Mark/Euro pro Mann, 10 Minute bohre un düvvele sin nochens 60 Mark/Euro (weil die zweit Stund anjefange hät), dat sin 120 Mark/Euro mal 30 Millionen, dat sin 3 Milliarden und 660 Millionen allein hück nohmeddaach, wat dr Stüür un demm Handwerk durch die Lappe jon! Kei Wunder, dat uns Staat am Engk es! Un deshalv hät dr Schäuble dat Schräuble-Verbot...“. „Weiße wat, Du kanns mich ens: Jang Du en die Weetschaff, ich düvvele dat Teil sellver an die Wand!“. Un jetz sitzen ich he en dr Märzkält nohmeddaach jemütlich wärm em Jlasbiergeschäf an dr Thek, in einer „gigantischen Schattenwirtschaft“ der anderen Art, un lommer ei lecker Kölsch nohm andere schmecke! Danke, Schäuble, dat hässe fein jemaat! Oder?!
 
In diesem Sinne

Ihr
Konrad Beikircher
 
 

©  2013 Konrad Beikircher für die Musenblätter
Redaktion: Frank Becker